По заминувањето на Марио Гомез во Баерн, Штутгарт се обидува на јаде соодветна замена во нападот. Челниците на клубот планираат дел од сумата што ја добија од Баварците да ја потрошат на квалитетен фудбалер од шпицот.
Во моментов Штутгарт се подготвува да испрати понуда вредна 20 милиони евра за холандскиот репрезентативец Клас Јан Хунтелар, кој доби дозвола од претседателот на Реал Мадрид, Флорентино Перез да си најде нов клуб.

Постои голема веројатност по само една сезона мината во Реал Мадрид, холандскиот репрезентативец, Рафаел Ван дер Варт да се врати во Хамбургер.
Ван дер Варт се најде на листата на прекубројни играчи во Реал и во моментов е слободен да си најде нов клуб.
Холанѓанецот во Мадрид дојде како големо засилување, но сепак не ги оправда очекувањата иако може да се каже дека и не ја доби вистинската шанса.
Минатото лето тој си замина од Хамбугер за 10 милиони евра, но се чини дека сега сумата за раскин на договорот со Кралскиот клуб ќе биде помала.
Покрај Хамбургер за Ван дер Варт заинтересирани се уште Вердер и неговиот поранешен клуб Ајакс.

Парагваецот Роке Санта Круз е ново засилување на Манчестер Сити, откако досегашниот негов клуб Блекбурн го ослободи за 18 милиони фунти.
Санта Круз го пропушти крајот на сезоната во Премиер лигата заради повреда на коленото, но тоа не влијаеше на неговиот трансфер. Вкупната вредност на трансферот изнесува 15 милиони фунти плус доплата за настапите и успехот на тимот во следната сезона, што изнесува околу 18 милиони фунти.
Своевремено менаџерот на Манчестер Сити, Марк Хјуз го донесе Парагваецот во Блекбурн за сума од 3.5 милиони фунти од екипата на Баерн и сега повторно го сакаше во својот тим, желба која раководството на "граѓаните" му ја исполни.

Поранешниот тренер на Лацио, Делио Роси изјави дека Наполи би добил големо засилување со евентуалното ангажирање на Горан Пандев.
"Горан дојде во Лацио како млад и неискусен играч, а сега е фудбалер со меѓународно искуство. Тој е најдобар играч во репрезентацијата на Македонија и играше во Лигата на шампиони. Мислам дека е подготвен за Наполи", истакна Делио Роси и продолжи:
"Пандев е втор напаѓач, а кај мене играше и како трет, бидејќи тој сака да им асистира на другите. Во минатите три години многу напредна и во секоја сезона постигна најмалку по десет гола. Секогаш сака да игра во центарот, нема доволно сила за 60 минути, но ако игра покрај Лавеци и Кваљарела, тие ќе бидат убиствено трио", заклучи Роси.
Претседателот на Лацио Клаудио Лотито објави дека Наполи е подготвен да плати 11 милиони евра за нашиот најдобар фудбалер Горан Пандев, но во наредните неколку дена ќе се донесе конечно решение.